Яармаг явах гурван шөнө, гурван өдрийн хөтөлбөрт аялал эхэллээ
Яармаг явах гурван шөнө, гурван өдрийн аялал эхэллээ” гэх үг цахим орчинд эрчээ авав.
Учир нь, Хан-Уул дүүргийн Засаг даргын Тамгын газрын захиалгаар Яармагийн авто замд явган хүний нүхэн гарц байгуулж байгаа. Ажлын хүрээнд авто замыг сэтэлж, бүтээн байгуулалтын ажлыг үргэлжлүүлэх шаардлагатай болсон тул “Хүннү молл”-ын баруун урд талын уулзвараас “Шинэ өргөө” хороолол хүртэлх 200 метр замын хөдөлгөөний зохион байгуулалтад түр хугацаанд өөрчлөлт оруулсан.
Яг энэ асуудлаас үүдэж иргэд маш их бухимдалтай байгаагаа илэрхийлээд байгаа юм. Арга ч үгүй биз. Талдаа 2-3 цагийг түгжрэл дунд амь тэмцэн өнгөрүүлж байгаа юм чинь. Ирж, очих цагаа тооцвол өдрийн тал лав өнгөрнө. Энэ хугацаанд хажуугийн машины охинтой танилцаж хуримлахдаа хүрлээ гэж хошигнох нь ч бий. Зарим иргэд бүр Төв аймгаар тойрон давхиж Яармаг дахь гэртээ ирдэг, гадагшаа нисэх байсан хүмүүс онгоцноосоо хоцорсон гэх мэдээ мэдээллүүд хөвөрч байна.
Энэ бүхний цаана ямар асуудал хөндөгдөж байна гэхээр нөгөө л нэг замбараагүй хот төлөвлөлт, замын буруу менежмент, хоорондоо уялдаа холбоогүй шийдвэрүүд. Яармагийн орон сууцны хороолол, зам төлөвлөлтийг зарим мэргэжилтнүүд буруушаадаг нь үнэн. Гэтэл үүн дээр нэмээд иргэддээ ч мэдэгдэхгүй, ямар журам зохицуулалт хийх нь тодорхойгүйгээр зам хааснаас болж иргэд цаг хугацаа, эрүүл мэндээрээ хохирч байна. Эрүүл мэндийг онцолж байгаа учир нь замын түгжрэлд өтгөн, шингэнээ удаан барих нь эргээд аюул занал учруулдаг гэдгийг эрх биш хүмүүс мэддэг болсон. Харин энэ бүхэнд хариулт эрсэн иргэддээ “тэмдэг тэмдэглэгээний дагуу хөдөлгөөнд оролцоорой” гэдэг үгээр л амыг нь таглаж сууна.
Мэдээж гарцгүй газраар гарсан иргэдийн амь насанд аюул учирч буйг шийдэх гэж байгааг нь буруутгасангүй. Хамгийн гол нь анхнаасаа замаа барихдаа хамт шийдэж болоогүй юм уу, иргэддээ зөвлөмж зөвлөгөө өгөлгүйгээр замыг нь шууд хаадаг нь яаж байгаа юм бэ. Эцсийн эцэст түгжрэл дунд түгжирч үхэж ч мэдэх нь ДАРГА НАР АА.
