Солонгост усанд автсан машинууд Монголд орж ирэх бий вий!
Саяхан Сөүл хотод болсон үерийн улмаас маш олон тооны техник хэрэгсэл, тэр дундаа автомашин усанд живж эвдэж гэмтсэн байна. Харин энэ машинуудыг нь хог хаягдлын цэгээс зарим наймаачин Монголчууд маань эх орон руугаа тээвэрлэх бий вий хэмээх болгоомжлол бий болсон юм.
Тэгвэл дараах мэдээлэл гарчээ.
“Өмнөд Солонгост 80 жилд тохиогоогүй хүчтэй бороо орсоноор Сөүл хотын иргэдэд ноцтой хохирол учирлаа.
Нэн ялангуяа Ганнам дүүрэг буюу баячуудын хороолол хамгийн их хохирол амссан. Автозам төдийгүй автозогсоолд тавигдсан олон машин бүрэн усанд автжээ. 3 хоногийн өмнөөс усанд автсан автомашинуудыг гаргаж эхэлсэн.
Нийт 1000 орчим тансаг зэрэглэлийн гадаад автомашин усанд живж, 5000 гаруй импортын автомашин эвдэрч гэмтжээ. Бодит тооцооллоор 658 тэрбум воны хохирол учирсан байна. Гэхдээ БНСУ-д даатгалын тогтолцоо сайн хөгжсөн тул хүндрэл гарахгүй бололтой. Самсунг, Хёндэ, DB, KB зэрэг даатгалын газрууд 559.8 тэрбум воны хохирол нөхөн барагдуулахаар тооцоолжээ.
Одоо хамгийн их яригдаж буй сэдэв нь усанд живсэн машинуудыг хуучин автомашины зах дээр гаргах вий гэсэн болгоомжлол байна. Тус улсын иргэд гадагшаа экспортлохыг ч эсэргүүцэн шууд устгалд оруулах хууль санаачлахыг эрх баригчдаасаа шаардаж эхэлжээ.” гэсэн байна.
