Г.Билгүүн: Өөрт ямар ч хамааралгүй эмэгтэйг нүцгэнээр харна гэдэг сонин мэдрэмж

Тольны өмнө зогсоод нүцгэн биеэ өөрөөсөө ч нуун байж хардаг байсан үе ард хоцорч, хүмүүс өөрийнхөө болон бусдын байгалиас заяасан бие махбодыг байгаагаар нь хүлээн зөвшөөрч, “эрүүлээр” хардаг болоод байгаа билээ.

Тэр ч утгаараа хүний биеийн галбир, гоо сайхныг ил тод харуулдаг “Nude”(нүцгэн) зургийг монгол залуус урлаг, уран бүтээл талаас нь харж, ихээхэн сонирхох болсон. Тэгвэл энэхүү урлагийг манайх шиг бүрэг ичимхий, харьцангуй хаалттай улсад таниулан, хөгжүүлэхээр хичээж буй залуусын төлөөлөл болох Г.Билгүүнтэй гэрэл зургийн nude төрлийн талаар ярилцлаа.

-Монголд Nude урлаг хэзээнээс хөгжиж эхэлсэн бэ? Таны хувьд анх яагаад гэрэл зургийн энэ төрлийг сонирхох болов?

-Энэ урлагийн тухайд бүр Грекийн үеийн барималуудаас эхлээд л хөгжиж эхэлсэн. Харин манай улсын хувьд 2007-2008 оноос түлхүү хөгжиж, nude зургийн үзэсгэлэн гарч байсан юм билээ. Манайд энэ чиглэлийн олон зурагчин байсан ч, Бэлгүтэй гээд залууг nude урлагийг түлхүү таниулж өгсөн гэж ярьдаг. Харин миний хувьд гэрэл зургийн салбарт ороод 4 дэх жилдээ ажиллаж байна. Анхнаасаа nude зургаар гараагаа эхэлж байсан. Ерөнхийдөө салбар бүрийн туршлага хуримтлуулах үүднээс гэр бүлийн зураг, нүцгэн зураг, хөрөг зураг гээд бүгдийг нь л дарж үзлээ. Анх бол ер нь сошиал хаягаа хөгжүүлэх гээд nude зураг дарж эхэлж байсан. Харин сүүлийн үед түлхүү хурим, фейшн зургууд дарж байна.

-Nude урлагийг Монголд хүмүүс хэр зөв ойлгож, урлаг талаас нь хүлээж авч байна вэ? Зарим хүмүүс ойлгохгүй, хүлээн зөвшөөрөхгүй байх тохиолдол олон байх?

-Манайд nude зургийг ойлгох цар хүрээ нь бага байна л даа. Яахав ойлгуулах гэж хичээж байгаа залуучууд олон байгаа. Гэхдээ заримдаа Цагдаагийн байгууллагаас садар самуунд уриалсан зураг тавьж болохгүй гэдэг санамж ирдэг ч юм уу, тиймэрхүү тохиолдол бий. Тэгэхээр зургуудаа нэг их олон нийтэд дэлгэхгүйгээр, ирээдүйд үзэсгэлэн гаргахдаа л бэлдэж байна.

-Nude зургийн онцлог, зорилго, ач холбогдол нь юу вэ?

-Ерөнхийдөө хүмүүст гоо сайхны таашаал мэдрүүлэхийг л хичээж байгаа юм л даа. Хувь хүний сонирхдог зургийн төрөл гэж байдаг шүү дээ. Зарим хүмүүс уул хад, байгалийн зураг хараад тайвширдаг байхад зарим нь эмэгтэй хүний бие, пропорци, гоо сайхныг мэдрэхийг хүсэх нь ч бий. Ер нь л хүн хүний сонирхол өөр. Тиймээс яг nude зураг ийм, тийм зорилготой гэж хэлэх нь өөрөө явцуу.

-Таны хувьд анхны nude зургаа хэдэн онд дарж байсан бэ? Анхных учраас сандарч байсан байх?
-Анхны зургаа одоогоос 3 жилийн өмнө дарж байсан. Эхний зураг учраас эвгүй л дээ. Сандарна, айж эмээнэ, өөрт ямар ч хамааралгүй эмэгтэйг нүцгэнээр харна гэдэг бас өөр мэдрэмж шүү дээ. Харин дараа дараагийнхаас зүгээр л гоё уран бүтээл гаргахын төлөө зүтгэдэг болсон.

-Таны үйлчлүүлэгчид ихэвчлэн ямар зорилгоор nude зургаа даруулахаар ирдэг вэ?

-18-25 насны эмэгтэйчүүд ихэвчлэн сошиал хүрээнд ашиглахын тулд мөн давхар дагагчаа нэмэхийн тулд ханддаг нь ажиглагддаг. Тухайн хүнд бас өөрийн гэсэн карьер байгаа шүү дээ. Түүнийгээ өсгөхийн тулд ирдэг гэх үү дээ. Харин 25-аас дээш насны бүсгүйчүүд зөвхөн өөрсдөдөө авч хадгалахаар зургаа даруулах нь түгээмэл. Учир нь залуу насныхаа гоо үзэсгэлэнг хадгалж үлдэхийн тулд 30 насандаа нэг даруулаад, 40 насандаа дахиад даруулдаг гэдэг ч юм уу тиймэрхүү зорилгоор ирдэг.

-Моделуудын хувьд өөрсдөө зорьж ирсэн хэрнээ цагаа тулахаар ичих, болих үе байдаг уу?

Тийм тохиолдол зөндөө. Би сошиал дээрээ өөрийнхөө дарсан эмэгтэйчүүдийн зургийг өөрсдийнх нь гуйлт, хүсэлтээр л тавьдаг. Харин зөвхөн өөртөө хадгалахаар nude зураг даруулах гэж ирсэн эмэгтэйчүүдийн хувьд ичнэ, эмээнэ. Би чинь бараг тэдэнтэй сэтгэл судлаач шиг л ярилцаж, асуулт асууж, аль болох нээлттэй, чөлөөтэй болгож байж зургийг нь дардаг. Түүнээс биш орж ирэнгүүт нь юу юугүй алив чи хувцасаа тайл гэхгүй шүү дээ.

-Ер нь зураг авалтын үеэр хэчнээн хүн байдаг вэ?

-Объект дотроо бол надаас гадна 2 хүн байдаг. Гэхдээ заримдаа ганцаараа явах үе ч бий. Яагаад гэхээр зарим хүмүүс хүний хажууд ичээд зургаа даруулж чаддаггүй. Энэ тохиолдолд гэрэл барьдаг хүнээ гадаа гаргаад хүлээлгэнэ. Харин зарим нь чөлөөтэй ярьж хөөрөлдөөд, өнцгөө ярилцаад авхуулдаг хүмүүс ч бий.

-Та энэ урлагт хөл тавьсан 3-4 жилийн хугацаандаа өнөөдрийг хүртэл хэчнээн моделийн зургийг дарав?

-Одоогоор 1800 гаруй юм уу даа. Гэхдээ инстаграм дээр бол 200 гаруй зураг л орсон байгаа.

-Магадгүй залуу насаа мөнхөлж, nude зургаа даруулахыг хүсдэг ч бие галбиртаа сэтгэл хангалуун бус байдгаасаа болоод зориг нь хүрдэггүй олон бүсгүйчүүд байгаа байх. Тэгвэл тань дээр ирдэг эмэгтэйчүүд бүгдээрээ төгс бие галбиртай байдаг уу? Эсвэл зүгээр л өөрийгөө байгаагаар нь хүлээн зөвшөөрчихсөн эмэгтэйчүүд ирдэг үү?

-Nude зураг гэхээр хүмүүс заавал аймаар лаг биетэй байх ёстой гэж бодоод байдаг. Гэтэл хүний донж гэдэг зүйл энэ төрлийн зурган дээр их чухал. Донжтой хүн зурган дээр цаанаасаа өвөрмөц гоё гардаг. Ядаж л үсээ гоё янзалчихсан байхад шууд тэр хүний нүцгэн бие дээр анхаархаасаа илүү, царайн дээр нь төвлөрдөг ч юм уу. Угаасаа ямар ч хүн хамгийн түрүүнд бусдын царай руу хардаг. Бие рүү нь биш. Тэгэхээр нүд их чухал байдаг.

-Nude зурагчин гэхээр хүмүүс нэг зүйлийг их сонирхож байгаа байх. Ажлаа хийж байхдаа зөвхөн уран бүтээлдээ төвлөрч чаддаг уу? Эсвэл тухайн моделоо яалтчгүй эрэгтэй хүний нүдээр хардаг уу?

-Энэ асуултыг хүмүүс их асуудаг л даа. Миний хувьд энэ ажлаар хоолоо олж иддэг, амьдралаа авч явдаг. Тийм учраас ажлаа хийж байхдаа энэ ямар гоё эмэгтэй вэ гэж бодоод байх зүйл байдаггүй. Хүн ер нь ажил, амьдралаа ялгаж сурах хэрэгтэй гэж ярьдаг даа. Гоё уран бүтээл хийхийн тулд би ажилдаа л анхаарахгүй бол хоёр зүйлд анхаараад байвал сэтгэлд сэвтэй болчихно.

-Таны хувьд олны танил хүмүүсээс зургийг нь дарах юмсан, сайхан бүтээл гарах байх даа гэж боддог хүн байдаг уу?

-Багаасаа шүтдэг байсан болоод ч тэр үү дуучин Агиймаагийн зургийг дарах юмсан гэж дотроо нууцхан боддог. Яваандаа санал тавина л гэж бодож байгаа.

-Одоогоор 1000 гаруй эмэгтэйн зургийг дарсан хүний хувьд эмэгтэй хүний биеийг юу хамгийн их тодотгож, гоё харагдуулдаг гэж боддог вэ?

-Миний бодлоор хөл, эгэм хоёр эмэгтэй хүнийг их гоё чимдэг. Би бас өөрөө хөрөг зураг дардаг болохоор нүд их чухал санагддаг. Гунигтай нүдтэй бол цаанаасаа л өрөвдөлтэй харагддаг. Тэгэхээр тэр зурагнаас авах таашаал нь хүртэл буурчихдаг.

-Та өөрөө 1000 гаруй эмэгтэйн зургийг дарсан хүн. Энэ явцад үнэхээр сайхан биетэй эмэгтэйчүүд ч олон харсан байх. Тэгвэл найз бүсгүйтэй болохоороо модел эмэгтэйчүүдтэй харьцуулах тохиолдол гардаг болов уу?

-1000 гаруй эмэгтэйн зургийг дарлаа гээд миний үзэл бодол дотроо өөр шүү дээ. Надад эмэгтэй хүнээс хардаг зүйл, өөрийн гэсэн сонирхол байгаа. Мэдээж модел эмэгтэйчүүд дунд сайхан биетэй ч эмэгтэй байсан, онцгүй биетэй эмэгтэй ч байсан. Тэглээ гээд би хайрлаж байгаа бүсгүйгээ тэдэнтэй харьцуулаад байх шаардлага байхгүй. Зүгээр л намайг ойлгодог байхад л болно. Ер нь ажиглаад байхад гэр бүл зохиоход саад болдог зүйл нь nude зураг дардаг гэхээсээ илүү хүнтэй эрт гэрлэлгүй, санаа суух хүртлээ яваад байдаг нь л буруу юм шиг санагдсан. Түүнээс олон эмэгтэйн зураг дарлаа гээд хайртай эмэгтэйгээ тэдэнтэй харьцуулна гэж байхгүй.

-Ингэхэд эрэгтэй хүмүүс ер нь nude зураг даруулдаг уу?

-Надад одоогоор 10 гаруй залуугийн зураг байгаа. Гэхдээ ил гаргачихъя гэхээр эрэгтэй хүмүүсийн зураг хэт задгайдаад байдаг. Тэглээ гээд зарим хэсгийг нь бүрсийлгэх гэхээр тэр зурагны үнэ цэнэ нь алга болчихно. Тэрний оронд одоохондоо зүгээр өөртөө хадгалж байсан нь дээр л гэж бодож байна. Яваандаа цаг үе нь өөрчлөгдөөд ирэхээр ил гаргаж болно шүү дээ.

-Nude зургийг урлаг, уран бүтээл талаас нь биш садар самуун гэж хардаг хүмүүс цөөнгүй байгаа байх. Та ярилцлагын төгсгөлд тэдгээр хүмүүст хандаж юу гэж хэлэх вэ?
-Харах өнцгөө л өөрчлөх хэрэгтэй. Нийгэм хөгжөөд байхад та бүхэн өнгөрсөндөө оршоод байвал улс хөгжихгүй шүү дээ. Энэ зүйл манайд хөгжих болоогүй гэдэг ч юм уу. Тэгж бодох нь буруу л гэж хэлмээр байна.