Хаяалаа хайрласан арслан, арслангаа адалсан ХӨВСГӨЛЧҮҮД

Хөвсгөл аймгийн наадмын хүчит бөхийн барилдаан өчигдөр /2022.07.29/ болов. Гэхдээ барилдаан хэл ам дагуулж, наадамчин олон орой 23:00 цагт эсэргүүцлээ илэрхийлсэн үйл явдал болжээ.

Тодруулбал, Хөвсгөлийн бөх сонирхогчид улсын арслан Ц.Содномдорж тэргүүтэй улсын цолтнуудыг нэрээ татахыг хүсч, үнэн шударга барилдаан хүсч, ундааны сав шидсэн асуудал гарсан аж.

Тус аймгийн бөхийн бүртгэл нь нээлттэй бус, сумын заануудыг бүртгээгүй. Улмаар улсын цолтнууд нь наадам болохоос өмнө аль хэдийнэ тохироо, найраа хийсэн, шөвгийн дөрвөн бөх нь тодорхой болсон гэгдэж байна.

Аймгийн цол олгох барилдаанд сумын заан цолтой 40 гаруй бөх бүртгүүлж чадаагүй байна.

Хөвсгөл аймгаас гадна Сүхбаатар, Дорноговь, Дундговь аймгийн наадмуудад өөр аймгийн бөхчүүдийг барилдуулахгүй, хаалттай наадна гэцгээжээ.

Түүнчлэн барилдаанд Ц.Содномдорж үеэл, хаяалдаа тахимаа өгч цолд хүргэж явааг эсэргүүцэн ундааны сав шидсэн байна.

Ц.Содномдорж арслан Үндэсний их баяр наадмаар Орхонбаярт унаж өгсөн. Ингэснээр тэрбээр хоёр ч дүүгээ улсын цолд хүргэсэн нь энэ гэнэ.

Өнгөрсөн жил Хөвсгөлийн наадамд түүнийг зодоглуулахгүй гэх маргаан бас дэгдэж, сошиал хэрүүл үүсч байсан билээ. Энэ мэт улсын ч, аймгийн ч наадамд цолтон төрүүлж яваа түүний карьерийг ард түмэн начин төрүүлдэг найрааны замаар ороход арай эрт байна гэлцэж буй юм.