Хууль зүйн сайддаа шүхэр барьж өгөхдөө яагаад сөгдсөн талаараа ажилтан өөрөө тайлбарлажээ

БНСУ-ын Хууль зүйн сайд бороотой өдөр гадаа мэдэгдэл хийх үеэр түүний туслах ажилтан сөгдөн шүхэр барьж өгч байгаа дүрс бичлэг цахим сүлжээнд гарч, ихээхэн шүүмжлэлийг дагуулаад байсан билээ.

Тэгвэл энэ талаар албан ёсны мэдэгдлийг тус ажилтан гаргасан байна. Тэрбээр, “Сайдын хажуу талд зогсож байсан ч сэтгүүлч зураглаач нар “Сайд харагдахгүй байна. Холд” гэсэн учраас ийнхүү хойно нь зогсож байтал хөл өвдөөд доош сөгдөж суусан” гэж мэдэгджээ.

Солонгосчууд энэ төрлийн асуудалд маш эмзэг ханддаг бөгөөд улс төрчдөө хүнлэг, эрх тэгш байж, эрх ямбаа хэтрүүлэхгүй байхыг шаарддаг юм. Тиймдээ ч уг асуудлыг хурцаар шүүмжлэн хүлээж авсан байна. Гэвч энэ явдлын шалтгаан нь тэдний бодсон шиг сайдын эрх ямба хэтэрсэн үйлдэл биш, ердөө ажилтан бас сэтгүүлчдийн хоорондын асуудал байсан бололтой.