Эмгэнэл: ОХУ-ын их өрийг тэглэхэд хүчин чармайлт гаргаж байлаа

August ৯, ২০২২

১,০৪০

Хөдөлмөр нийгмийн хамгааллын сайд А.Ариунзаяа ” Хайртай аав маань Монголын аавуудын өдөр буюу 08 дугаар сарын 08-ны өдөр тэнгэрт дэвшлээ. Хань ижил, үр хүүхэд, ах дүүс, төрөл төрөгсөд, анд нөхөр, хамтран ажиллагчид гүн эмгэнэж байна.

Хэл дуулаагүй хүмүүс энэ постноос маань мэдээ авах болов уу гэж найдаж байна. Бидний салах ёслол Баасан гарагт тохионо. Аав маань амжилт бүтээл дүүрэн, нэр хүндтэй, сайхан амьдарсан. Үргэлж мөнхөд бидний сэтгэлд байх болно. УМ МАНИ БАДМЭ ХУМ”.

ДҮГЭРСҮРЭНГИЙН АЮУШ /1955-2022/

Бидний хайртай ах, халамжит хань. элбэрэлт аав. доктор Дүгэрсүрэнгийн Аюуш 2022 оны 8 дугаар сарын 8-ны өдөр өвчний улмаас таалал төгслөө.

Д.Аюуш 1955 онд Ховд аймагт Т.Дүгэрсүрэнгийн 2 дахь хүүхэд болон төрсөн. 1973 онд Улаанбаатар хот дахь Зөвлөлтийн 8 дугаар дунд сургуулийг төгсөж улмаар 1973-1975 онд Монгол улсын их сургуулийн орчуулагчийн ангид, 1975-1980 онд Ломоносовын нэрэмжит Москвагийн УИС-д, 1986-1988 онд Киев хотын УИС-ийн аспирантурт, 1992-1993 онд Тайванийн Шинжүгийн ОУХДС-ийн худалдаа, эдийн засгийн курс, 1999-2001 онд ОХУ-ын ГХЯ-ы Дипломатын Академид суралцаж төгссөн.

Тэрээр олон улсын харилцааны мэргэжлийг эзэмшсэн дипломатч, олон улсын эдийн засгийн харилцаа судлаач, олон зуун шавь нарыг бэлтгэсэн багш хүн байлаа.

1980-1982 онд МУИС-ийн орос хэл заах аргын тэнхимд багш, 1982-1986 онд Орос хэлний багшийн дээд сургуульд багш, тэнхимийн эрхлэгч, 1988-1991 онд Монгол Улсаас ОХУ-д суугаа ЭСЯ -нд ажилтан, 1991-1996 онд Монгол-Тайванийн хамтарсан компанид захирал, “Талын айл” ХХК-ийн ерөнхий захирал, 1996-1999 онд Монгол Улсаас ОХУ-д суугаа ЭСЯ-д худалдаа, эдийн засгийн атташе, 2001-2003 онд тус ЭСЯ-д худалдаа, эдийн засгийн туслах ажилтан, 2003-2007 онд атташе, 3-р нарийн бичгийн дарга, 2007-2009 онд “Оросын сан” ТББ-д зөвлөх, “Умард хөрш” сэтгүүлийн Ерөнхий редактор бөгөөд хариуцлагатай нарийн бичгийн дарга, Г.В. Плехановын нэрэмжит ОЭЗА-ийн Улаанбаатар хот дах салбарт багш, зөвлөх, 2009-2012 онд тус салбарын дэргэдэх “Монгол Лицей”-н захирал, 2012-2015 онд МУИС-ийн Олон улсын харилцаа, нийгмийн ухааны сургуульд дэд профессор, 2015-2020 онд зөвлөх профессороор, 2021 оноос Эдийн Засгийн Үндэсний Дээд сургуульд “Олон улсын эдийн засгийн харилцаа”-ны тэнхимийн эрхлэгч, зөвлөх профессороор тасралтгүй ажиллаж байлаа.

Д.Аюуш ОХУ-ын их өрийг шийдвэрлүүлэхэд авьяас билигээ дайчлан, хүчин чармайлт гарган ажиллаж Монгол Улсын Ерөнхийлөгчийн өргөмжлөлөөр шагнагдаж байв.Тэрээр Олон улс. орон судлалын докторын хамгаалуулах зөвлөлийн гишүүнээр одоог хүртэл ажиллаж байлаа.

Түүний хөдөлмөр зүтгэлийг үнэлж 2013 онд Монгол Улсын Засгийн газрын шагнал “Байгаль орчны Тэргүүний ажилтан”, 2006 онд “Худалдаа үйлдвэрийн Тэргүүний ажилтан”, “Их Монгол Улсын 800 жилийн ойн медаль”, 2013 онд “Боловсролын Тэргүүний ажилтан” тэмдгээр болон АЛТАН ГАДАС. одонгоор шагнагдаж байлаа.

Таны минь хайр энэрэл, гэгээн дүр бид нарын зүрх сэтгэлд үүрд мөнх орших болно. Алтан дэлхийн хөрсөнд амгалан нойрсдоо.