“Хүүгээ зусланд явуултал зодуулж, хамар нь хугараад ирсэн”

Есөн настай хүүгээ зусланд явуулж, араас нь хоёр хоногийн дараа уулзахаар очиход хамт амарч байсан хүүхдэдээ зодуулсан байжээ. Үүнээс хойш хоёр сарын хугацаа өнгөрч байхад зодсон хүүхдийн ар гэр болон тухайн зуслангийн удирдлагууд хариуцлага хүлээхгүй, уучлалт хүсэхгүй байна хэмээн хүүгийн ээж манай сайтад хандсан юм.

Тодруулбал, Иргэн М өнгөрсөн зургаадугаар сарын 11-нд есөн настай хүүгээ “Нарс” зусланд амраахаар явуулжээ. Хүү нь дуу цөөтэй, даруухан тул найзуудтай болгож, бусадтай харилцаж сургахаар анх удаа зусланд явуулсан байна.

Гурав хоногийн дараа буюу зургаадугаар сарын 14-нд эргэхээр очиход хүүгийнх нь хамраас нь цус гарч, хувцас нь цус болсон байдалтай уйлж иржээ. Хүүгээ харсан ээж гайхаж, юу болсон талаар асуухад бүлгийн ахлагч, 11 настай Ч гэх хүүхэд ирснээс нь хойш дарамталж, зодсон талаар хэлсэн байна.

Энэ талаар хүүгийн ээж М “Хүүхдийн маань нүд нь хөхөрч, хамар нь хугарсан байхад зуслангийн багш, ажилчид “Хов зөөх муухай шүү” гээд тоогоогүй байгаа юм. Бүх хувцас нь цустай болсон байсан. Сайхан дурсамж бүтээгээд ирэх байх гээд хүүгээ зусланд явуултал зодуулаад, бүр хамар нь хугараад ирлээ. Энэ бол зуслангийн багш, ажилчдын буруу. Гэтэл биднээс уучлалт ч гуйхгүй, цагдаа шүүхээрээ яв. Бидэнд хамаагүй гэж хэлсэн. Би маш их гомдолтой байна” хэмээн ярилаа.

Хүүгийн ээжийн дэлгэрэнгүй яриа болон “Нарс” зуслангийн багшийн тайлбарыг видео мэдээллээс үзнэ үү.