Сургалтын төлбөрөө олохоор айлын хашаа буддаг хүүтэй таницаарай
Хэнтий аймаг, Хэрлэн сум (Монголын Мэдээ) — Айлын хашааг тохижуулж өгөөд их сургуулийнхаа төлбөрийг төлөхөөр хөдөлмөрлөж байгаа Эрдэнэбатыг МҮОНРТ-ийн Монголын мэдээ сурвалжилжээ. Тэрбээр энэ жил 12-р ангиа төгсөж ирэх намар оюутан болох ажээ.
“Би 12-р ангийн сурагч Эрдэнбат байна. 8-р ангиасаа эхлэн хөрөг зураг зурч эхэлсэн. Захиалгаар ойр зуурын мөнгө олоод аав ээжээ мөнгө авахгүй л явж байна” гэв.
Тэр ирэх намар их сургуулийн оюутан болно. Тэрбээр оюутны сургалтын төлбөртөө нэмэрлэхийн тулд айлуудын хашаан дээр зураг зурж өгч байгаа аж. Түүний анхны бүтээл бол “Тэмээн жин, хоточ нохой, Монгол ахуй, хүүхэлдэйн баатрууд” байжээ. Тэрбээр энэ бүтээлийг 4 хоногийн хугацаанд найзуудтайгаа хамтран зурсан байна.
“Ээжтэй цуг ажилладаг нэг эгч харин хашаан дээрээ зураг зуруулья гэхээр нь зүгээр хаалган дээр зуруулах байх гэж бодсон чинь том хашаа юм байна гэсэн. Тэгээд юу зуруулах вэ гэсэн чинь тэмээн жингийн цуваа, хүүхдийн тоглоом энэ тэр гэсэн. Анхных болохоор чадах эсэхээ мэдэхгүй байсан. Юу ч гэсэн оролдоод үзье гээд эхэлсэн дээ. Будаг их ордог юм байна лээ. Хүүхдүүдийн үзэх дуртай баатруудыг харж байгаад л зурсан”.
Түүний бүтээлд үйлчлүүлэгч нар нь сэтгэл хангалуун байдаг гэж тэр ярьсан юм. Хэрлэн сумын гэр хорооллын айлууд Эрдэнэбатаас жишээ авч хашаагаа будаж тохижуулж будах дуртай, цэвэрхэн орчинд амьдрахыг эрмэлздэг болжээ.
Тус сумын иргэн “Би өөрөө хөдөө байдаг юм. 3 охинтой. 3 охиноо аль болох тав тухай хашаандаа гоё цэвэрхэн байлгахыг хичээгээд байна. Залуучууд хашаандаа хоггүй, цэвэрхэн амьдарвал зүгээр дээ гэж боддог.”
Эрдэнэбат хашаа буддаг болсоноосоо хойш авъяас нь улам хөгжиж зуны амралтаа үр бүтээлтэй өнгөрөөж байна.
