Б.Мөнгөнзулийг Орхон аймгийн засаг дарга С. Батжаргал хүлээн авч хүндэтгэл үзүүлэн “НЭГ” өрөө байраар шагнаж бахдам амжилтыг нь урамшуулсан байна
мэдээ

Б.Мөнгөнзулийг Орхон аймгийн засаг дарга С. Батжаргал хүлээн авч хүндэтгэл үзүүлэн “НЭГ” өрөө байраар шагнаж бахдам амжилтыг нь урамшуулсан байна

Өнөөдрийн сайхан мэдээ •••Дэлхийн шатрын 44 дүгээр олимпиад Монгол улсаа төлөөлөн оролцож дэлхийн аварга болсон Орхон аймгийн харьяат 14 дүгээр сургуулийн сурагч Б.Мөнгөнзулийг Орхон аймгийн засаг дарга С. Батжаргал хүлээн авч хүндэтгэл үзүүлэн

Энэтхэгийн Ченнай хотод дэлхийн шатрын 44-р олимпиадад амжилттай оролцсон Монголын шигшээ багийн тамирчид өнөөдөр эх орондоо ирлээ. Энэ тэмцээнд манай эмэгтэй шигшээ багийнхан дэлхийн 160 орны 162 багаас 15 дугаар байрыг эзэлсэн. Эмэгтэй багийн гишүүн Орхон аймгийн “Хангарьд” спорт клубын тамирчин Дэлхийн шатрын холбооны Дэд мастер 17 настай Б.Мөнгөнзул охин дөрөвдүгээр ширээнд түрүүлж, алтан медаль хүртсэн Монголын анхны эмэгтэй тамирчин болсон билээ.

-Дэлхийн шатрын олимпиадад анх удаа оролцож, Алтан медалийн эзэн болсон чамд баяр хүргэе. Тэмцээний сэтгэгдлээ хуваалцаач?
-Баярлалаа. Би эхлээд нэлээд сандарсан. Миний хувьд багийн тэмцээнд оролцож байсан боловч ийм чансаа өндөр том тэмцээнд багаараа оролцож үзээгүй учир эхний өрөгтөө маш их сандарсан. Сүүлдээ гайгүй болсон.

-Хэддүгээр өрөгийн ямар тоглолт хамгийн хэцүү байв?
-Миний хувьд нийт 11 өрөгөөс 10 тоглож, нэг хожигдож, нэг өнжсөн. Гуравдугаар өрөгөөс хойш хүндэрч эхэлсэн, яагаад гэвэл багаараа хожоод дээшээ гарч ирсэн учир. Ерөнхийдөө бүх өрөг хэцүү байсан даа. Дөрөвдүгээр өрөгт би Германы их мастертай тоглохдоо гараанаас эхлэн муу байрлал авч явсаар хожигдсон. Цаана нь олон өрөг байгаа учир энэ хожигдлоо мартах хэрэгтэй, ганц өөрийгөө биш багаа бодож тоглох ёстой гэж маш их хичээж тоглосон.

-Медалийн төлөө тоглох сүүлийн өрөг хүнд байв уу?
-Алтан медалийн төлөөх тоглолт гэдгээ аль болох бодохгүй, зөвхөн тоглолтдоо анхаарсан. Шатар тоглохдоо сэтгэлзүйн хувьд хамгийн тайван байж, чөлөөтэй сэтгэн бодож оновчтой нүүдлээ хийдэг.

-Дараагийн тэмцээн нь хэзээ вэ?
-Есдүгээр сард болох өсвөрийн шатарчдын дэлхийн аварга шалгаруулах тэмцээнд оролцоно.

-Шатрын спортыг яагаад сонирхох болсон бэ? Цэцэрлэгт байхаасаа шатар тоглож эхэлсэн гэж сонссон.
-Би зургаан хүүхэдтэй айлын гурав дахь нь. Шатар тоглож эхлэхэд миний аав, ах хоёр их нөлөөлсөн. Бидний багад манай аав, ах хоёр гэртээ өдөр болгон шатар тоглодог байсан. Би хараад л сууж байдаг. Заримдаа би тоглодог ч ерөөсөө хождоггүй. Аав, ах хоёр минь намайг шатарт дуртай болгосон.

Б.Мөнгөнзулын багш “Хангарьд” спорт клубын шатарчин, ОУМ Н.Баттулга
Б.Мөнгөнзулын багш “Хангарьд” спорт клубын шатарчин, ОУМ Н.Баттулга

Би дараа нь ахтайгаа шатрын дугуйланд явж эхэлсэн. Дугуйланд очоод багштайгаа долоо хоногт нэг тоглодог. Тэр үед манай ах багшийг нэг удаа хожсон. Тэр үед би багшийг хожих юмсан гэж дотроо бодож, их хичээсэн. Сүүлдээ тэмцээнд орж, медаль авч урам зориг орсон доо. Нэг л мэдэхэд шатрын спортод маш их дуртай болсон.

-Шатар тоглож байхад хамгийн сайхан нь юу вэ?
-Шатар тоглоход нүүгээд л цагаа дардаг. Тэр цагны чимээнд би их дуртай.

Related Articles

Back to top button